LETTERA APERTA AD AURELIO DE PEZZENTIIS
Presidè, nun me dicite niente si ve parlo a ccore franco e schiejo ‘e ccarte ‘nterra! Penzo ca quacche giurnale pure vuje ‘o liggite o, per lo meno, v’arrivano ‘e lamentele ‘e nujaute tifuse, chille ca venono ô statio e cchille ca pavano l’abbunamento a SKY o a PREMIUM e – comme si nun abbastasse pavano ‘a fora mana pure diece evere pe vedé n’amichevole. E allora fósse ora ca ce stisseve a ssèntere allimmeno ‘nu poco; cca simmo tutte quante cunvinte ca accattanno tre o quatte bbuoni jucature e nno meze-cazette (comme a dDonadèl(lo) o a mMesto), tre o quatte bbuoni jucature uno o duje pe reparto (addó se fa cchiú acqua...) se putesse dà filo ‘a torcere a cchiú ‘e ‘na scuatra nurdista e, cu ‘o permesso d’ ‘o Palazzo, se putesse cuncorrere pure p’ ‘o scutetto... Ora mo, presidè ce vulisseve spiecà pecché cu tutt’ ‘e paparelle azzuppate cu ‘a vendita d’ ‘o Pocho e cu chelle ‘ncassate cu ‘a Ciampionsa, vuje ‘sta mossa ‘e vulé accattà ‘sti jucature nun ‘a facite? Vuje parlate ‘e pruggetto-Napule, ma cu ‘e jucature accattate fino a mmo, me pare ca ce state piglianno p’ ‘o culo! Chi ve parla è ‘nu tifoso d’ ‘o Ciuccio ‘a mano a Pappacone, da ‘e tiempe ‘e Bugatti, Comaschi, Viney, Luís Vinício etc. etc. e ce à sempe refuso bbelli surdacchielle pe ffà ‘o tifoso e pretennesse chiarezza e aunestà e nno prese ‘ngiro! Vulite ‘na scuatra ‘e centro-classifica, ‘na scuatra ‘e quinto, sesto posto? Si è accussi dicitelo chiaramente e nisciuno pretenne niente!!! Ma nun ce parlate ‘e pruggetto... Nun ce facite allargà ‘o core comme a ‘nu cufunaturo pe ppo farce ‘o scennere dint’ê cauzette! ‘E pruggette servono a costruí, no a sgarrupà: nun s’accattano guagliune (quanno e si s’accattano...) e ppo se dànno ‘mpriestito a ati scuatre; chesto serve a ffà denare, no a ffà pruggette! A nnuje servono tre gghiucature ‘ndifesa (purtiere cumpreso) e ‘nu granne sostituto ‘e Cavani! Pirciò presidè vedimmo ‘e nun aizà porvere; otto jurne e se nchiude ‘o mercato; vedimmo ‘e fà ‘e fatte e nno chiacchiere e tabbacchere ‘e lignammo, pecché facennole dimustrate esattamente ca ce state piglianno p’ ‘o culo; e chesto nun v’è cuncesso! Fraditanto lèggio, ca pe fà n’ata cosa ‘e sorde, se ne va pure Gargano - è 'na scigna puntigliosa, nun' se po' di' 'o cuntrario, ma è ll’unicu ‘ncuntrista ca tène ‘a scuatra!
Giesú, Giesú, Giesú... presidé e chisto fósse ‘nu pruggetto?
A mme me pare ca, visto e cunziderato ca pure vuje ve ne site accorto ca dint’ô Palazzo cuntate quanto ‘e doje ‘e coppe a bbriscula quanno ‘o triunfo è a mmazze, state pruggettanno ‘e levà mana, ‘e sgarrupà piezzo pe piezzo ‘a scuatra e regnerve ‘o vurzillo. Nun se spieca ‘e n’ata manera ‘stu mercato ‘e accattà e vennere ca overamente è assaje strano, pe nun dicere ch’è ‘na chiaveca, presidè!
sbardellone
